最低工資

這兩日立法會在審議最低工資條例既草案。除左靠早前「廿蚊張」既言論引起過一些討論之外，自己覺得係社會上對於最低工資既討論唔係太多。

很多學者及自由經濟支持者都認為最低工資不但幫不到低收入人士，還有機會令到佢地失業。

我自己又唔多同意這個觀點。在我觀察所得工作崗位有係度，始終唔係話Cut就可以Cut的。工作量就係咁多，你話要減少就可以減少既咩?較早前有一位無良老闆話有最低工資，佢公司要盈警，就來要執笠。係人都知做生意最大舊錢係去左個租金度，今天聽到立法會陳淑莊既發言，佢講得好好。佢話佢有個朋友想去銅鑼灣發展，所以就去問下價，究竟係時間廣場對面既地鋪幾多錢租。原來要成三十二萬一個月，一千幾百既薪金你話係唔係濕濕碎呢?你估加多員工幾千真係做唔住，你做唔到咪去d租金平d既地方！你自己俾d大財團襟住搶就要d員工去填。你自己沒有本事就唔好學人做生意啦！唔做生意，你咪去打工，一定要做老闆嗎?自己做唔掂老闆第一樣野就Cut人，減薪。這些人又點可以同佢捱。現在經濟已經算比較之前好，你話再來多次金融海嘯佢地點對你。d無良老闆最叻就係講「共渡時艱」，叫d員工捱下遲些公司生意好左就俾返你。但到到真係公司有錢賺就話要儲埋d錢留返來「積穀防飢」。佢地可能唔記公司有錢賺都係員工辛苦幫佢賺回來的。係佢地身上拿多一仙幾毫就好似要了佢地條命咁！

講返今次最低工資既問題，我自己覺得最低工資是需要的。這是一種尊重，係對出過勞力既工人的一種肯定。出了力去做工，但到頭來連生活都維持唔到，你說是多麼的氣餒呢！但我自己就反對將外傭納入最低工資條例既保障。一來外傭自己已經有最低工資保障；二來請外傭現在是包食包住包機票，佢地生活已經有保障。如果還要納入最低工資條例既保障，恐怕對本地既工人不公平。還有，可能將來就唔包食包住包機票了。

另外，我覺得很奇怪，為什麼除了討論最低工資之外就沒有討論最高工時呢？我自己覺得最低工資同最高工時都是相輔相成。你有了最低工資，難保d無良老闆要你超時工作做返條數出來。所以最高工時係防止d無良老闆出古惑。記得當年做Big 4，一到日，每天工作由10am到1-2am，還要維持幾個月。最高工時就係要防止d人太過份。政府時時話要家庭共融，但連屋企都沒有得返點共融呀！人唔係機器，要休息的。如果真係有些project係趕，你這個星期咪OT，下個星期就應該俾返你休息。例如限制一個月工作幾多小時，就已經很flexible。

最後，希望最低工資能夠順利立法，同時可以制定一個俾工人可以有尊嚴地生活的工資。