剛由海洋公園返回屋企，已經急不及待要分享今日既感受。我自己覺得今年比上年更好玩，可能同我之前參考過網上既攻略，可以不用花太多時間排隊有關。今日一早就出發，大約3:30pm左右已經到達海洋公園正門。提提大家，出發前記得上網看一看開放時間，而且要早些少到。因為今日是星期日原本係4:30pm可以入場，但不知道為什麼突然早了半個鐘開門。這半個鐘都幾緊要，因為當抵達第一間鬼屋時，就剛好開門。因為參考過網上既攻略，我同女朋友第一間去既鬼屋係．．．
我地雖然係由正門出發，但係一開始我地唔係玩近正門果幾間鬼屋，而係直接搭海洋列車上山頂玩「喪屍反擊戰」。去到都還未開始入得，但係我自己就比較擔心，所以都只係在附近影下相等開門。
「喪屍反擊戰」係需要玩家拿起「鐳射亡魂槍」射係牆上既藍色感應器的。每射中一次就會有分數，所以走果陣記得睇下自己支槍既分數呀!我自己覺得一開始玩這個鬼屋作為熱身都係一個不錯既選擇。雖然這個鬼屋既場境係室內又唔係十分之驚嚇，但娛樂性十足，所以可以很快就玩得十分之投入。記得上一年十分之失敗去了一間有室外場境既鬼屋，加上到達時候尚早，天色還未灰暗，所以玩得唔係太有Mood。另外，如果你早來這裡(六時前)，佢會俾你一張Fast Pass，十時之後可以快些去玩大樹灣既鬼屋或「哈囉喂十年回魂館」。
玩完這個，我地就馬上趕去位於大樹灣既兩間鬼屋 -- 「彭氏兄弟之童眼」及「幽靈遊樂園」。這兩間鬼屋係其中最大的兩間鬼屋，所以驚嚇程度同內裡的裝飾陳設都是最好的。我地去到大樹灣差不多5:30pm，但這兩間鬼屋還未開放，所以都需要在外面等了一陣。
「幽靈遊樂園」內裡係營造一個遊樂場既氣氛，感覺十分之不錯，驚嚇位都有很多。可能我地去到都是剛第一批入去玩既關係，所以d鬼鬼都好落力去嚇人，而我地就玩得很開心。由於那個鬼屋係入面最大既一個，所以都十分之有耐玩性。我建議大家一開始就好玩這個或童眼，因為之後我想再入去玩都沒有機會，太多人了。我估計過了九時，最少要排兩個鐘左右先入得去玩。
「彭氏兄弟之童眼」係第三間玩既鬼屋。由於之前沒有看過童眼套戲，所以玩得唔算十分之投入。不過，裡面既氣氛都唔錯。在我地等排隊入去玩時，係大街兩旁既鬼鬼都十分之吸引人。佢地既造型很靚，而自己最喜歡係那個東海龍宮既海龍王，佢行得好慢，十分之趣致可愛。如果時間夾得好的話，那裡有一些大型既Show係舞台舉行。我同婷婷就看了兩個show。第一個係叫做「魔石、血、舞池」同「群星亂舞嘉年華」。我自己就覺得魔石、血、舞池比較悶些，但係群星亂舞嘉年華就十分之精彩，還有個美麗Dancer
。
。
玩完幾個大型既鬼屋，我地就殺上山玩。由大樹灣電梯上來，我地第一間見到的鬼屋係「粵夜惊魂」。去到出面都唔係太多人，大約二十人左右，排一陣就已經可以入得去玩。由於已經入黑，所以氣氛都不錯。在排隊等候期間，見到一個樵夫在水裡，大家就要小心啦．．．自己覺得這個鬼屋比較短。由於有些地方在室外，所以唔算太驚嚇。不過，相比起上一年同一位置既東瀛鬼屋，我就覺得今次做得出色很多。我想可能係地點氣氛既關係，與其他鬼屋唔同，排隊既地方有一些樹木，感覺好似自己在森林迷路，突然去到另一個地方既感覺。
之後，我地就去了位於比較遠，在跳樓機附近既「巫術高校」。這個同時係我地排得最耐既地方。我建議大家可以買少少野食，一路排隊一路食，這樣就可以慳返唔少時間。提提大家今年海洋公園有一個「新」既安排，就係入場時會有一個check point，去check一check你有沒有帶一些外來既飲品同食物。據海洋公園所講，海洋公園係有一條附例係唔俾遊客帶外來既飲品同食物入公園內。之前，公園就有關既附例都沒有嚴格執行，但今次就嚴格很多，入去一定要檢查你既袋。講返間鬼屋，我自己就覺得麻麻地。可能在出面都等左幾耐既關係，入到去都沒有太大心機玩。其實來這間鬼屋係有short cut的。如果你由McDonald那裡行樓梯落去，你會見到有個牌叫你由此路進入鬼屋。如果你跟住去，就會撓了個大圈。但如果你唔理佢，再行多少少落去，過左個公廁再沿住海洋冰室上去就會快些少。
這時候大約係七點左右，我地已經玩哂山上同大樹灣既鬼屋。我地之後就返回位於海洋公園正門既鬼屋玩。經由海洋列車，很快就到達山下。一出去，第一間見到既鬼屋就係「一人火葬場」，出面排隊既人唔係好多，大約都係十多個左右。我覺得這個遊戲都幾特別，係要玩家嘗試一下訓係棺材既體驗???
記得上一年個通靈實驗室，這個我就覺得好很多。由於係一個人玩既關係，係鬼屋出面有兩個棺材等你試下夠唔夠膽訓入去。記得自己都曾經到過兩次火葬場，一次係嫲嫲過身，另一次係爺爺過身。去到火葬場都沒有太看清楚火葬場既陳設。記得那個打齋個道士，佢話仙人火葬時唔可以望住佢地火化，唔係仙人就走得唔安落。因此，自己都沒有真真正正看一看火化時是怎麼的。所以今次係一個好既機會，等大家「瞭解」一下。
再之後就去了近纜車站附近既「哈囉喂十年回魂館」。由於出面都唔係太多人，所以我地無用到張Fast Pass。這裡真係幾值得玩，裡面既陳設同自己日常生活有關，所以都幾驚嚇。我就玩左兩次多，真係幾好玩！如果叫我俾分，這個我覺得係第二好玩的。最開心就係，這裡有冷氣涼，行左咁耐，這裡排隊係比較舒服的。另一個好笑係見到海洋公園主席盛智文(Allan Zeman)自己著過既攪鬼衫既展覽。有一個造型還要是新娘裝！原來佢都係一個玩得之人。試問一個需要創意既主題公園又點可以由一個唔玩得既人做領袖？所以我都係覺得由一個鬼佬來做主席都係比中國人適合。中國人太唔玩得，時時都板起塊面。同下屬「相處」，很多時候都係扮親民，始終都有一個距離。
最後一個鬼屋就係「熱舞吸血城」，裡面係模仿Disco。不過，由於自己很少很少去，所以就唔太有感覺。同埋，我覺得都唔驚嚇的。不過，有一度係要分開男女行。自己既女朋友就驚到行都行唔到啦。我玩完哂所有的鬼屋都是8:30pm多，所以今年都有很多時間俾我去影相。唔知係唔係今年排得無咁辛苦，所以覺得今年個event都幾好。
最後，提意大家跟以上既流程行: 「喪屍反擊戰」->「幽靈遊樂園」->「彭氏兄弟之童眼」->「粵夜惊魂」->「巫術高校」->「一人火葬場」->「哈囉喂十年回魂館」->「熱舞吸血城」
沒有留言:
發佈留言